إسلام إبراهيم يوجه رساله إلى والدته في عيد الأم: أصعب سنة مرت عليّ (صور) – فن وثقافة

وجّه الفنان إسلام إبراهيم رسالة محبة واعتزاز لوالدته بمناسبة عيد الأم الموافق 21 مارس من كل عام، وذلك عبر حسابه بموقع التواصل الاجتماعي «فيسبوك» ونشر مجموعة صور تجمعهما سويًا مذ طفولته وحتى شبابه.

والدة إسلام إبراهيم دخلت في غيبوبة

وكتب إسلام إبراهيم، عبر حسابه بـ«فيسبوك» قائلًا: «السنة دي كانت أصعب سنة في حياتي على الإطلاق مش لأي سبب في الدنيا غير لأن أمي تعبت، حرفيًا كنت حاسس إني لا حول ليا ولا قوة وكأني طفل تايه في ملكوت الله».

إسلام إبراهيم يكشف سبب عدم إعلانه خبر مرض والدته

واستطرد «أربع أيام وعيني مبتنشفش تقريبًا، أطول فترة عيطت فيها في حياتي، أربع أيام مش قادر أحط لقمة في بقي وكأن معدتي معمولها بلوك، لغاية ماربنا استجاب لدعايا وأنا بعيط بحرقة و بتذلل له إنه يشفيها لغاية مافاقت من الغيبوبة بفضل ربنا، وساعتها بس حسيت إن روحي اتردتلي».

وتابع: «أنا طبعًا وقتها مقولتش لأي حد ولا كتبت على السوشيال ميديا لأني ماكنتش قادر أرد على حد وماكنتش عايز أضيع دقيقة يمكن تحتاجني فيها الدقيقة اللي عرفت قيمتها وهى جنبي، عرفت يعني إيه أفضل أسمع صوتها كل يوم، عرفت يعني إيه أشوف كلمة ماما على التليفون، عرفت إن كل حاجة في الدنيا بتتعوض إلا الأم والأب ممكن تتعوض المال، الشغل، الزوجة حتى الولاد، لكن عمرك ما هتقدر تعوض دقيقة فاتتك من غير ما تكون جنب أمك وأبوك».

الرضا والقناعة من الأمور التي تعلمها إسلام إبراهيم من أمه

واستكمل إسلام إبراهيم بقوله «عندي إيمان داخلي إن الرابط بين الأم وولادها مش مجرد رابط نفسي أوعاطفي لا في رابط بيولجي، احنا خرجنا من الجسم ده وهنفضل متصلين بيه لأبد الآبدين لأن الحالة الصحية اللي أنا وصلتلها وقت ما تعبت ملهاش تفسير غير كده».

وأضاف قائلًا «طبعًا لو قلتلكم هى عملتلي إيه هى وأبويا في حياتي أعتقد دي حاجة تحتاج مجلدات، على سبيل المثال لا الحصر في حاجات بكتشفها في شخصيتي بتسهل عليا حاجات كتير في الحياة بعرف إن السبب فيها تربيتك، إني مثلًا عمري ما ببص لحاجة عند غيري أو اتمنظر بحاجة عندي على غيري».

وتابع: «مثلًا العربية هى أربع عجلات ودركسيون بتوصلنا المكان اللي عايزين نروحه مش مهم أبدًا موديلها طالما سليمة ومبتروحش للميكانيكي، البيت هو مكان نضيف من أربع حيطان وظفيتهم الستر، مظهرك أهم حاجة فيه النظافة الشخصية والهدوم المكوية والجزمة المتلمعة مش لبس البرندات اللي بألاف الجنيهات».

واختتم إسلام إبراهيم رسالته لوالدته «وسائل الترفيه بجميع أنواعها لو معانا تمنها هنعملها وهننبسط مش معانا فده مش نهاية الكون معني كده اسمه القناعة لو زرعته في ولادك يبقي كأنك سيبتلهم فلوس الدنيا كلها حاجة عمر ما الإنسان بيقدر يكتسبها غير من طفولته وتربيته، ربنا يخليكم ويبارك في عمركم وأفضل خدام تراب رجليكم العمر كله وبالنسبة ليكي يا ماما كل سنة وإنتي طيبة يا أهم حد في الكون».

وظهر إسلام في رمضان الماضي، من خلال مسلسل «100 وش» أمام نيللي كريم وأسر ياسين، ويظهر في موسم مسلسلات رمضان 2021 من خلال مشاركته في مسلسل «نجيب زاهي زركش» أمام يحيى الفخراني.