مستشار “الوزراء”: شبكة صرف أمطار تتكلف 400 مليار جنيه – مصر

علق الكاتب الصحفي هاني يونس المستشار الإعلامي لرئيس مجلس الوزراء، على أزمة غرق بعض الشوارع بسبب الأمطار، وذلك في منشور له عبر حسابه الشخصي على موقع التدوينات القصيرة “فيسبوك”.

وقال يونس: “الساعة دلوقتي 1 صباحا، والجو قارس البرودة، وأقسم بالله فيه مسؤولين كبار في جهات الدولة المختلفة، لسه في الشوارع، مع عمالهم، بيتعاملوا مع آثار الأمطار”.

وكشف يونس عن بعض الحقائق المهمة قائلًا: “في ظل التغيرات المناخية، اللي بتحصل في العالم كله، لازم نتعود على اللي بيحصل، وأظن كلنا شفنا فيديوهات كتيييير لدول كبرى غرقانة والحقيقة اللي لازم نعرفها، إننا في مصر معندناش شبكة منفصلة لصرف الأمطار، غير شبكة الصرف الصحي، إلا في إسكندرية، وبتصرف على البحر على فكرة”.

وأضاف: “طيب ليه معندناش، ومعملناش لأنها مكلفة جدا، وممكن تعملوا بحث هتلاقوا وزير سابق للمرافق بيقول إنها تتكلف 400 مليار جنيه، فهل إحنا معانا المبلغ ده؟ طبعا لا، طيب لو معانا نعمل بيه الشبكة دى؟ طبعا لا، طيب ليه؟ لأن فيه أولويات حضرتك عندنا أكتر من نص قرانا بيعانوا طول العام، مش يومين تلاتة فى السنة، من عدم وجود صرف صحى أصلا، فلو الفلوس معانا، نعمل بيها شبكة صرف صحى لملايين من أهالينا تقيهم المعاناة اليومية”.

وتابع: “طيب والحل؟ نتعامل في الكام يوم اللي بيحصل فيهم الأمطار الشديدة دي، ونستحمل، وندعم الرجالة اللي غرقانين فى الميه من ساعات، لحد الموجة ما تعدى، ومش إحنا بس اللى بنعمل كده، وارجعوا تانى للفيديوهات اللى مالية اليوتيوب، وفيها كبريات الدول غرقانة هى كمان ويا ريت نبطل تشيير لفيديوهات الدنيا فيها غرقانة، لأن ده بيحبط الناس اللى فى الشوارع، وباذلين أقصى ما فى وسعهم ده الوضع، ولازم نتصارح شكرا لكل المصريين اللى بيدعموا بلدهم تحيا مصر”.